"Dia di Portugal"

Non têm cristám qui non sabe

Quim sã Luís di Camões.

Non têm posia más suávi

Qui posia di Camões.

Camões sã unga letrado

Bêm capaz di Portugal;

Naçám já ficá falado,

Di sala atê quintal.

Camões, "Príncipe di Péta",

Diverá sã grándi hóme.

Su ôlo já cai na Cêta,

Ele sã já passá fome.

Quelóra vai Portugal,

Camões já ficá cholido;

Buli co corte rial,

Na grádi ficá capido.

"Lusíadas" sã su glória,

Sã honra di nôs cristám.

Ali têm tánto estória,

Di nôs-sua grándi naçám!

Índia Camões já vai

Macau, cavá virá vêm.

Na grádi torná já cai,

Tánto consumiçám têm.

Na Goa buli co guéra,

Na Macau posia fazê.

Cavá torná vai su tera,

Más trabalo já sofrê.

José dos Santos Ferreira (1967).

in P. Manuel Teixeira. A Gruta de Camões em Macau. Fundação Macau e Instituto Internacional de Macau, 1999